Leef graasboere en graasboerinne!

Es ech Zösters maedje woor ‘t veur mich eine groate ieër óm gevroag te waere óm de nuuj graasboerin van 2012 te zeen.

Wie Herman mich belde moos ich van hem d’r mèr effe good euver naodenke en mit miene minsj euverlègke. Nae ich höb d’r neet euver nao hove dènke en wós auch zeker det mien wederhelf det net zoa wiej ich fantasties zou vènje.

En hiej sjtoan ich den, kloar óm d’r same mit mien prinse Julien en Mark eine geweldige vasteloavend van te make.

41 jaor geleje bön ich gebaore oppe Deetersewaeg.Mien mam kump oet Doonder en miene pap is eine echte graasboer.

Hae sjtóng hiej 49 jaor geleje op dees buhn es prins Hein de ieëste. Ich denk den auch det hae vanaovend hartsjtikke greuëtsj op mich is.

Miene broor Ruud is in 2008 prins carnaval gewaes in Neeritter dus ich kèn waal sjtèlle det ‘t vasteloavesblood mich mit hoage sjnelheid door de aore sjtruimp.

Ich bön getrouwd mit eine foetelaer, mèr dae höb ich sins weer in de Mehre wone geïntegreerd in ‘t Zösters Graasboerriek. Weer wone in die fantastiese buurt mit ós twieë kènjer en twieë hunj en höbbe dao eine geweldige groep vrunj óm ós haer.

Auch wirke doon ich in ‘t Graasboerriek. Mer dao kènt geer mich waal baeter neet te dèks zeen, want det is bie de apotheek in Zöstere.

Es de elfde van de elfde d’raan kump bön ich jeder waek aanwezig op de repetisie van de Zaate Hermenie van de brandjwaer Valsj Alarm. Mit mien tuba in de henj heuër ich den aan wie die club de sjoonste vasteloavesleedjes droet bleus.

Auch det is eine geweldige groep. Ich mót ze allein nog laote weite det ze nog twieëj waeke höbbe óm miene vastelaoveswage te boewe.

Leef luuj, genóg gezeiverd.

Loat ‘t fieës noe mer beginne, want dees graasboerin zèt de vastelaovend in vuur en vlam!

Graasboere alaaf In de Mehre alaaf Valsj alarm alaaf