Allerbèste Graasboere en Graasboerinne,

Het is al laat, dus ich zal gauw beginne.
Ein nuuj sezoen, ein anger gezich,
det is effe wènne, veur uch mer auch veur mich.
Paars is ingeruuld veur sjoan road,
en dao zeen de jonges en maedjes van Sjiet Egaal noe good mit gekloat.
Mer gezeen door de uig van eine leek,
sjtuit hie nog sjteeds eine jong mit eine scepter en ein sjteek.
Ein medaaje mit ’t logo van de Graasbörgers d’r op,
en ein sjtel vaere die fier wappere baove miene kop.
D’r is ein dingk wat al die verseersele neet kinne verberge,
dus det zal ein bietje aanpassingsvermoge van uch verge:
Zelfs in de sjonste vastelaovespekskes
Lieke mien bein net lucifersjtekskes!
Gelökkig zeen det mer biezake,
het eurnaamste is tot auch ich d’r same mit uch eine sjieke vastelaovend van gaon make.
Hie te mooge sjtaon maak mich trots en blie,
zeker mit mien maedje aan mien zie.
En mit uch allemaol in deze sjoane zaal,
vraog mer aan de auwt prinse dao, die kènne det geveul auch waal.
Tot sjlot wurt van de nuuje prins ein liefsjpreuk verwach,
ein die zörg veur eine glimlach.
Daoveur val ich truuk
op ein aw en bepreufde truc:
Geweuën jatte van awt-prins Luc
Dae zag hie veurig jaor
mit ein verwiezing nao de kleuër van zien haor:
Drie daag knoaje
mit dae roaje.
Mer… bie Sjiet Egaal geit det knoaje van allein
det duit bie os neet eine, mer ech ederein!
Ich sjtaon daorom garant
veur deze variant:
Drie daag knoaje
mit DIE roaje!
Netuurlik höb ich op eige krach
zelf nog ein paar aanjpraekende leuze bedach:
Ich belaof uch, wer hawte ’t besjaaf,
mer auch weer neet al te braaf.
De ieëste is enne variante op eine populaire vastelaoveshit,
es dae wurt gedrejd den zungk meistal ederein mit.
Dit jaor gein drie daag sex mit dae kale,
mer rempetempte mit dae sjmaale.
En den bedoel ich netuurlik op die trööt,
anges krieg ich drek al van Albaer euver mien nööt.
Leef luuj, gaot nog efkes neet weg,
want hie is mien motto den ech:
Raap al uch trommele en trööte biejein,
en doot allemaol mit, want deze vastelaovend is van ederein!