Nuuts



21-03-2019

Beste mensen, wegens omstandigheden zal de benefietmiddag aanstaande zondag niet doorgaan.



Graasboerin Mandy I (03-02-2019)

Leef Graasboere en Graasboerinne,

Greuëtsj en verieërd bön ich, det ich hie noe in mien kleid moog sjtaon en uch eindelijk ken mitnumme in dae bubbel wo ich al maonje in zit. Zjwevend op ein vastelaoveswolk vanaaf 't moment det Herman en Hans mich vrooge. Ich hoofde gein seconde nao te denke en bön bäökend mer mit eine brejje glimlach in miene auto nao hoes gereeje om 't Luc te vraoge, ofja, eigelijk te zegke want ich hauw al “Jao” gezag. Oppe galazitting zoog ich miene Prins Olav, jus zo’n fieésbieës wie mich. Aug mit Jeugdprinses Frederique hauw ich mich gein baetere kenne wunsje. 
Ich moog nao Jessie. Op d’n 11e van de 11e höbse in mien biejzeen alle ins en outs verteld, neet te vergaete bedank veur de manj en diene breef. Sjiek det ich dich moog opvolge!

In miene kop begoos al gauw vanalles te breuje en de luuj die waat mich kenne weite det ich van de lieskes en planninge bön dus ich hauw al direk get te doon. De zomer moos nog beginne mer ich leep al sjtoffe oet te zeuke oppe mert in Mestreech mit Mariëlle en Bibi. Erm maedjes, det geer al mien appjes moos beantjwoorde. Bedank! Mariëlle en aug Marco (de beste fotograaf dae ich ken) eëwig dank det geer mich höb geholpe en gesjteund bie alles al dae tied. Geer zeet super!!!

Herman en Hans, die höbbe 't geweite van die lieskes en nao get väöl spam oppe app sjnel Kitty ingesjakeld. Doe es ervaringsdeskundige woors d'r veur mich oppe sjtressige momente. Bie de knuip doorhakke. Kitty, danke!

Es maedje van Zöstere bön ich, mit mien breurke Dennis opgegreujd bie mien pap en mam; Rob van Math van Lendfers en Illse van Sjeng van 't Sjtuf. Zoa fijn det geer noe kent mitgeniete mit mich. Waat vonj ich ’t zjwaor en lestig teage uch te zjwiege. Geniet noe mer mit! Ich bön begoos oppe Salvatorsjtraot en mit ein oetsjtepke nao de Nuujstadt en Bengelder, weer in Zöstere belandj. Nao 8 kieër in ein anger sjtraot van zöstere gewoond te höbbe gewoond kense waal sjtelle det ich os dörp good ken. 
Noe, oppe Mertsjtraot, bie miene 'auwe' of auwt prins Luc en mien twieë augappels Eef en Babs. Dao ligk toch ech mien hart.

Es zzp-er wirk ich es ambulant begeleider en help ich luuj veuroet die mit probleme kampe onger de naam Men-s. In miene vrieje tied bön ich gaer in de Zösterse keffees, sjpeel ich aaf en toe ein toernooitje tennis bie T.V. Rosus en hauwt ich mich rondj vastelaovestied bezig mit ’t LKVW en ‘t gruupke S.j.n.a.p.z., de vrouwluuj van de auwt prinse. 
Reize, sjporte en meziek zeen mien echte passies. Meziek make is euverigens neet miene sjterkste kantj, ich dans d'r leever op. 
Mit Zaate Hermenie Kappes Moos bön ich oppe tamboerein oajt begoos wiej die mich es jongk maedje op sjleiptouw noome mit de träötetoch. Dao zeen de vastelaoveswortels ontsjtange. Nao hieel get hooghede in de femilie is ’t noe miene tied!
Mit 't beste wach ich tot 't letste...Mien klubke Zaateweg, det waat d'rveur haet gezörg det ich opnuuj 't plezeer in Vastelaovend ging belaeve. Ich zeen d'r al ein paar bezörg kieke...neet weer eine.... ! Sjtiekem hauwt g’r t aug al verwach. Geine paniek, alles kump good. Viere en geneete same, det is 't belangriekste.

Ich sjloet den aug aaf mit
Deze vastelaovend gein mommegezich
Mer danse pos 't mörgeleeg mit mich!

Zaateweg Alaaf
Graasboerinne Alaaf
Sjn.a.p.z. Alaaf
Graasboerriek Alaaf!

Image
Image

Jeugprinses Frederique I (27-01-2019)

Allerleefste Graasbuurkes en Graasboerinnekes,

’T woor op eine werme aovend, aafgeloupe zomer.
Petro en Leon van de raod kome op bezeuk en vroogte mich: 
‘Wils doe os nuuj jeugprinses waere?’
Ich sjprong ein gaat in de loch en sjrieëwde: ‘Jao, natuurlik!’
En noe ‘n hauf jaor later sjtaon ich hie den es 6e jeugprinses van ’t Graasboerriek.
Eindelik hoof ich neet mieër te sjwiege.

Frederique Derrez is miene naam. 1 x 11 vastelaoves-jaore jongk.
Ich ben gebaore en getaoge in Zöstere. 
Dochter van Elles en Johan en trotse zus van breurke Jules.
Allebie mien oma’s wonen auch hie in ’t dörp.

Vastelaovend-viere zit mich pas éch in ’t blood, al generaties langk.
Miene opa van paps kantj - dae helaas neet mieër onger os is - woor prins en president van de Sjoutvotte oet Gelaen. 
En mien oma dao dansmarieke. 
Als gans jongk maedje leep ich same mit pap en mam’s zaate hermenie d’n optoch mit.
Mer neet te vergaete: miene pap zit hie bie de raod.

Al vief jaor langk vorm ich same mit Noor en Tia ’t vastelaoves-zanggruupke 3ZM, de drie Zösterse Maedjes.
Dao naeve maak ich noch meziek oppe saxofoon bie de jeughermenie.
Handjballe is ech miene groatste hobbie, es aanveurster van ’t D3-team van NOAV sjpeel ich elke zaoterdig ein pötje handjbal.
En op mien 7e sjpeelde ich mit in ’t sjpel van de Heiligdomsvaart. Dét woor pas sjiek.

Ich zit in groep 8 van de aopebare sjoal ‘De Springdonk’.
Geertje en Natascha zin mien juffe.

Ich wil gaer get luuj bedanke.
Breurke Jules, omdets doe samen mit mich dit geheim höbs bewaard.
Pap en mam, det geer dit veur mich doot.
Oma Tiny en oma Elly, die sjtaon altied veur mich klaor.
Opa Piet en opa Lambert, die dees daag hie baove euver mich wake.
Paet-tant Carla en paet-oom Leo, die zin altied zoa good veur mich.

Beste jeugraod, groate prins Olav I, graasboerin Jessie, de nuuj graasboerin en alle graasboere en graasboerinne, jongk en auwt,
same mit uch vastelaovend viere is eine groate druim dae veur mich oetkump.
Weer gaon d’r same eine sjieke vastelaovend van make en det ónger mien motto: 
‘Doot mer gek, dan deisse al geweun genog.’

Graasbuurkes en Graasboerinnekes, Alaaf
De jeugraod, Alaaf
De jeughermenie, Alaaf
NOAV, Alaaf
3ZM, Alaaf
De Graasbörgers, Alaaf
De Zösterse vastelaovend, Alaaf

Image
Image

Prins Olav I (12-01-2019)

Béste Graasboere en Graasboerinne,

Prins zeen is get wo ich neet lang euver höb naogedach en direk ‘’jao op höb gezag!
Niks vermoedend in de Côte d'Azur rinkelde miene tillefoon en ‘t leefst sjrieëvde ich ’t antwoord toen al door de megafoon!
Joanna…, al 12 jaor miene sjat, mit dich heij ich ’t hiej al éns euver gehad mér det deze druim zoew oetkomme, heij ich toen nog neet bevat.

Létste maonje höb ich mich van de radar gehaoje want ich waor bang det ich mich zelluf zoew verraoje. Mér hiej sjtaon ich den, Prins Olav d’n 1ste en moog es 70ste prins euver ‘t Graasboerriek gaon heerse. Ich höb al éns mooge oefene biej de voetbalclub want dao höb ich ’t auch al éns tot prins gesjöp.

Vastelaovend viere haet altied al biej ós in de femilie gezaete want ich höb neet allein blauw blood mér auch antiliaans blood. Ich bön de zoon van John en Livia Eberson, breurke van Vera en trotse oom van Jaex en Ravi.
Es internationaal chauffeur biej VTS Transport in Boxmeer riej ich mit de mediciene door Europa heen en weer. The flying Dutchman is miene truck en dao bol ich oere mit aan ein sjtök.

Es dörpsgek bön ich euveral veur te vange dus waem wit gaon ich auch waal oppe riekswaeg in de bel hange. Deze vastelaovend gaon ich rigtig gaas geave zodet we same eine sjieke vastelaovend gaon belaeve. Want ein dink kan ich belaove aan die greune, geer komt nog flink aan ’t beune.

Es lid van Òntsjpoard, bön ich trots det ich in ós jubileumjaor prins moog waere. Ich gaon den auch mit veul sjpass en plezeer veurop mit mien veare.
Es jong mit twieë linkse hénj, höb ich toch al get kénne regele mit 6 bénj.
Geer ként al raoje det det eine oplegger is!

Ich gaon noe aafsjloete want anges loupe mig de luuj nao boete.

Dus Graasboere en Graasboerinne zeet mit dees dolle daag allemaol d’rbiej,
Maak sjpas en plezeer en höb ’t same leuk,
den gaon ich noe aafsjloete mit miene sjpreuk:

NEET LANG LULLE MAAR DIE GLAZE VULLE!

Zöstere alaaf
Òntsjpoard alaaf
Graasbörgers alaaf

Image